Yvonne Lindberimik ateqarpunga, Aarhus Universitetimilu psykologitut ilinniarsimavunga. Kalaallit Nunaani Danmarkimilu ukiuni arlalinni psykologitut sulinermik misilittagaqarpunga. Ullumikkut namminersorlunga ilaatigut tarnikkut misissuinernik, siunnersuinermik, supervisionimik kiisalu terapiimik suliaqarpunga.

Nuummi inunngorpunga Narsamilu peroriartorlunga. Kalaallit kulturiannik inuiaqarifiinnillu ilisimasaqarnera sulininni pingaarutilittut inissisimavoq. Psykologitut sulinermi inuit ataasiakkaat inuunerminni atugaasa, nukittuffiisa kulturikkullu tunuliaqutaasa aallaavigineqarnissaat pingaartippara.

Sulininni meeqqat, Inuusuttut ilaqutariillu kiisalu inuttut atukkat tarnikkut ajornartorsiutit assigiinngitsut suliaqarfigisimavakka. Aamma Alliaq-mi ukiuni arlalinni nakuusernermik eqqugaasimasunik kiisalu nakuusersimasunik terapiimik sullissinermik misilittagaqarpunga. Tamatuma saniatigut Kalaallit Nunaanni spiralimut tunngassuteqartumik sulinermi arnat suleqatigisarsimavakka.

Sulininni peqqissaartumik sulinissaq, attaveqatigiinnermi ersarissuunissaq kiisalu sullitat, ilaqutaasut suleqatigisartakkallu ataqqillugit suleqatigineqarnissaat pingaartippakka.